اسلام آباد ۔ 18 جولائی (اے پی پی) وفاقی وزیر غذائی تحفظ تے تحقیق صاحبزادہ محبوب سلطان نال خمیس کوں یونیڈو دے پاکستان اچ نمائنداں ملاقات کیتی۔ یونیڈو اقوام متحدہ دا ادارہ ہے جیرھا جو ممبر ملکاں اچ صنعتی اتے ایندے نال منسلک شعبیں دی ترقی کےتے تکنیکی اتے مالی مدد کریندے۔ وزارت غذائی تحفظ دی سانجھداری نال یونیڈو ”ایگرو فوڈ اینڈ ایگرو انڈسٹری ڈویلپمنٹ “ دے منصوبے تے کم شروع کیتے۔ ایں منصوبے دا مقصد کے پی کے اتے بلوچستان اچ لائیو سٹاک اتے سیباں دی افزائش اتے متعلقہ بندیاں کوں ایں بارے تربیت ڈیونڑ ہے۔ حکومت جاپان ایہ منصوبہ شروع کرنڑ سانگے 50 لکھ ڈالر دی منظوری ڈے ڈتی ہے۔ اگست دے پہلے ہفتہ اچ وفاقی وزیر محبوب سلطان باقاعدہ ایہ منصوبہ شروع کریسن۔ پاکستان ایگریکلچر ریسرچ کونسل وی ایں منصوبے اچ پارٹنر ہے، جیرھا جو متعلقہ تربیتی کورس کراونڑ اچ مدد کریسی۔ وفاقی وزیر صاحبزادہ محبوب سلطان آکھیے جو زرعی ایمرجنسی پروگرام تحت اتے گوشت دی پیداوار رتے برآمد ودھاونڑ سانگے اساں کے پی کے اچ منہ کھر توں پاک ممکنہ علاقے/زونز داانتخاب کر یندے پئے ہسے، یونیڈو ایں سلسلے اچ اساڈی مددکریسی۔ ایہ منصوبہ 2023ءاچ مکمل تھیس،جیرھا جو بلوچستان اتے کے پی کے اچ خشک اتے تازہ فروٹس، آئل سیڈز، لائیو سٹاک اتے ڈیری، ٹراﺅٹ دی ویلیو چین توں متعلق مسئلیاں دے حل، تربیتی کورسز دے اہتمام توں گھن تے سٹیک ہولڈرز دی فعال شمولیت تے کم کریسی۔انہاں آکھیا جو منصوبے دا بنیادی مقصد ملک اچ گوشت، فروٹ اتے سبزیاں دی پیداوار ودھاونڑ ہے۔
