اسلام آباد۔ 30 مئی (اے پی پی) وفاقی وزیر سرمایہ کاری قیصر احمد شیخ آکھیے جو پاکستان علاقائی تجارت، اقتصادی اصلاحات اتے ڈیجیٹل ترقی دے ذریعے ہک پرکشش سرمایہ کاری مرکز دے طور تے ابھردا پئے۔ اے ڳالھ انہاں کاریک انسٹی ٹیوٹ دی پنجویں سالانہ ریسرچ کانفرنس دے ݙوجھے ݙینھ خطاب کریندیں آکھی ۔ اے کانفرنس یونیورسٹی آف سرگودھا دی سانجھ نال منعقد تھئی جیندے اچ اسلامی ترقیاتی بینک، پاکستان سنگل ونڈو، علامہ اقبال اوپن یونیورسٹی، انٹرنیشنل روڈ ٹرانسپورٹ یونین، سسٹین ایبل ڈویلپمنٹ پالیسی انسٹی ٹیوٹ اتے ٻئے بین الاقوامی اداریں شرکت کیتی۔ قیصر احمد شیخ آکھیے جو حکومت کاروبار اچ سوکھ پیدا کرݨ کیتے بھرپور اصلاحات کریندی پئی اے جنہاں اچ ریگولیٹری فریم ورک دی ڈیجیٹلائزیشن، شفافیت اچ وادھا اتے غیر ملکی سرمایہ کاری دی حوصلہ افزائی شامل اے۔ انہاں ݙسایا جو پاکستان بزنس پورٹل جہیں پلیٹ فارمز دے ذریعے کاروباری رجسٹریشن اتے لائسنسنگ دے عمل کوں سوکھا بݨایا ویندا پئے۔ انہاں آکھیے جو پاکستان اچ مہانگ دی شرح 38 فیصد توں گھٹ تھی تے تقریباً صفر تے آ ڳئی اے جݙاں جو پالیسی ریٹ 22 فیصد توں گھٹ تھی تے 11 فیصد تے آچکیے جیڑھا ہک مستحکم معاشی ماحول دی نشانی اے۔ وفاقی وزیر چین-پاکستان اقتصادی راہداری (سی پیک) کوں علاقائی انفراسٹرکچر اتے تجارتی رابطیں دے ودھارے اچ ہک سنگ میل قرار ݙیندیں آکھیے جو پاکستان وسطی ایشیائی ملکاں، چین اتے خلیجی ریاستاں وچال ہک قدرتی پل دا کردار ادا کر سڳدے۔ کانفرنس اچ قازقستان دے سفیر یرژان کسٹافن وی شرکت کیتی جنہاں پاکستان کوں خطے اچ قازقستان کیتے ہک اہم تجارتی شراکت دار قرارݙتا۔ انہاں ݙسائے جو ݙوہیں ملکاں وچال تجارتی حجم 50 ملین ڈالر توں ودھ تے 239 ملین ڈالر تئیں پڄ ڳئے جیکوں 14 ارب ڈالر تئیں ودھایا ونڄ سڳدے۔
