جنیوا /اسلام آباد۔30اپریل(اے پی پی) وفاقی وزیر ماحولیاتی تبدیلی ڈاکٹر مصدق ملک جنیوا اچ باسل، روٹرڈیم اتے سٹاک ہوم کنونشنز دے کانفرنس آف پارٹیز دے موقع تے منعقدہ اقوام متحدہ دی کیپیٹل ڈویلپمنٹ فنڈ دے زیر اہتمام اعلیٰ سطح دے مشاورتی اجلاس بعنوان ”اچے خطرات اتے نظر انداز شدہ منڈیاں اچ ترقی سانڳے سرمائے کوں متحرک کرݨ“ اچ پاکستان دی نمائندگی کیتی۔ وزارت ماحولیاتی تبدیلی توں جاری بیان موجب اجلاس توں خطاب کریندے ڈاکٹر مصدق ملک ترقی پذیر اتے موسمیاتی خطریں توں ݙوچار ملکاں سانڳے موثر اتے سوکھے مالی معاونت دی وختی لوڑھ تے زور ݙتا ۔ انہاں آکھیے پاکستان ماحولیاتی لحاظ نال پائیدار ترقی، سبز معیشت اتے قدرتی وسائل تے مبنی حل کوں ترجیح ݙیندا پئے ،پاکستان دا عالمی گرین ہائوس گیساں دے اخراج اچ حصہ ھک فیصد توں وی گھٹ اے مگر اے دنیا دے ساریں توں ودھ موسمیاتی تبدیلی تں متاثرہ ملکاں اچ شامل اے ایجھے ملکاں سانڳے ماحولیاتی مالی وسائل کوں بروئے کار گھن آوݨ ٻہوں ضروری اے تاں جو اساں پیرس معاہدے دے اہداف گھن سڳوں تے کمزور آبادیاں دا تحفظ کیتا ونڄ سڳے ڈاکٹر مصدق ملک بین الاقوامی مالیاتی اداریں تے ترقیاتی شراکت داراں توں اپیل کیتی جو او ماحولیاتی مالی معاونت تئیں رسائی سوکھی بݨاون ، ماحولیاتی موافقت دی ٹیکنالوجیز اچ سرمایہ کاری کرن تے ترقی پذیر ملکاں اچ استعداد کار اچ ودھارے دے منصوبیں دی حمایت کرن۔ انہاں پاکستان دی نیشنل ڈٹرمینڈ کنٹریبیوشنز دے تحت مقرر کیتے ڳئے اہداف بشمول قابل تجدید توانائی دے ودھارے ،شجرکاری اتےپائیدار آبی وسائل دے انتظام دی مکمل وابستگی دا اعادہ کیتے۔ اے اجلاس اقوام متحدہ دے اداریں، ترقیاتی مالیاتی اداریں تے موسمیاتی لحاظ نال متاثرہ ٻئے ملکاں دے وزراء دی موجودگی اچ منعقد تھئے جئیں دا مقصد پائیدار ترقی سانڳے عوامی و نجی شعبیں توں مالی وسائل کوں متحرک کرݨ دے عملی فریم ورک دی تشکیل اے۔
