اسلام آباد۔7مئی (اے پی پی) وزیراعظم محمد شہبازشریف ہندوستان دی بلااشتعال جارحیت توں بعد ترکیہ دی پاکستان دے نال یکجہتی اتے حمایت دی تعریف کریندے ہوئیں آکھیے جو پاکستان دی خودمختاری اتے علاقائی سلامتی تے بھارت دے ݙرپوک حملے جنوبی ایشیا وچ امن و استحکام کوں شدید خطرے اچ پا ݙتے اتے اے ناقابل قبول اے۔ ترکیہ دے صدر رجب طیب اردوان آکھیے جو ترکیہ صورتحال دی کشیدگی کوں گھٹاوݨ دی حمایت کریندے اتے پاکستان دے پراݨے دوست دے طور تے اپݨا کردار ادا کرݨ کیتے تیار اے۔ وزیراعظم دفتر دے پریس ونگ توں جاری بیان دے موجب وزیراعظم محمد شہبازشریف کوں ترکیہ دے صدر رجب طیب اردوان ٹیلی فون کیتے۔ وزیراعظم ہندوستان دی بلااشتعال جارحیت توں بعد ترکیہ دی پاکستان دے نال یکجہتی اتے حمایت دی تعریف کیتی۔ انہاں بھارت دے میزائل حملیں دی شدید لفظاں وچ مذمت کیتی جئیں دے نتیجے وچ 26 بے گناہ مرد، تریمتاں اتے ٻال شہید تھئن۔ انہاں آکھیے جو پاکستان دی خودمختاری اتے علاقائی سلامتی تے بھارت دے ݙرپوک حملے جنوبی ایشیا وچ امن و استحکام کوں شدید خطرے اچ پا ݙتے اتے اے ناقابل قبول اے۔ صدر اردوان پاکستانی شہریاں دیاں قیمتی جاناں دے ضیان تے دلی تعزیت دا اظہار کیتے۔ انہاں جنوبی ایشیا وچ امن کیتے پاکستان دے عزم دی تعریف کریندے ہوئیں پاکستانی عوام نال ترکیہ دی یکجہتی دا اعادہ کیتے۔ خطے وچ امن کیتے پاکستان دے عزم دا اعادہ کریندے وزیراعظم پوری قوت اتے طاقت نال اپݨی خودمختاری اتے علاقائی سلامتی دے دفاع کیتے پاکستان دے عزم دا اعادہ کیتے ۔ وزیر اعظم آکھیے جو پاکستان، بھارت دی بغیر کوئی ثبوت ݙیوݨ دے پہلگام واقعے وچ پاکستان کوں کوڑ دی بنیاد تے ملوث کرݨ دیاں کوششاں کوں واضح طور تے مسترد کریندے۔ انہاں دا ٻیا آکھݨ ہئی جو بھارت ایں واقعے دی غیر جانبدار اتے شفاف بین الاقوامی تحقیقات دی پیشکش دا جواب نی ݙتا اتے ایں دے بجائے جارحیت اتے غیر ذمہ دارانہ ریاستی رویے دا خطرناک رستہ اختیار کیتے۔ صدر اردوان ݙسائے جو ترک وزیر خارجہ نائب وزیراعظم اتے وزیر خارجہ محمد اسحاق ڈار نال اڄ گالھ کیتی اے اتے ݙوہیں موجودہ صورتحال تے تفصیل نال ڳالھ مہاڑ کیتی اے۔ انہاں آکھیے جو ترکیہ صورتحال دی کشیدگی کوں گھٹاوݨ دی حمایت کریندے اتے پاکستان دے پراݨے دوست دے طور تے اپݨا کردار ادا کرݨ کیتے تیار اے۔ انہاں آکھیے جو ترک قوم پاکستان دے سفارتی اقداماں دی کامیابی کیتے دعاگو اے۔
.jpg)
